E Mänästiră Floreśti

O ʒivipen monahalo ande kadava than andar o źudeco Vasluj boldel pes and-e istoria ʒi kana sas xulaj o Śtefan o Baro, kana kerelas pes jekh tikno skito p-ol aćhilimata jekhe avere vazdimasqe, haj kerdǎs pes e Mänästirǎ Floreśti. Varekana sas tala o Somnal Plaj, tradini katar starecǎ grećǎ, kaj andar o berś 1863, pala o liipen le mänästirenqe barvalimatenqo, kadalenqi zor te na maj avel.

Jekh paramići phenel ke kana sas xulaj o Kuza, aśundoj ke e Mänästirǎ Floreśti si tradini katar o śero greko o Nil, kaj ći dukhalas les le manuśenθar kaj marenas k-o udar la mänästirǎqo, kerel jekh andar „lesqe droma garavde”.

Xurǎvdo sar ćorro mardǎs rakǎl k-o udar kadale mänästirǎqo haj manglǎs te beśel andre. Ći sas mukhlo d-ande jokhar, pala kodoja ke maj manglǎs jokhar sas mukhlo and-e livni planglimasqi. O dujto ges o Kuza sikavdǎs ke sas xulaj haj phendǎs xolǎme le śeresqe Nil pala ol bange bukǎ haj o barvalipen katar e mänästirǎ, haj ke le ćorre manuśen na-i len so te xan. Maj palal, kana ol barvalimata le mänästirǎqe Floreśti sas line, o Nil trebalas te ʒal pesqe andar e mänästirǎ feri soça daśtilas te ingerel and-ol vasta.

Atunćǎθar, o ʒivipen le manuśenqo khuvdǎs pes le ʒivimaça la mänästirǎqo, e but kuć buki sas e Ikoana kaj kerel bare bukǎ le Devlesqe Dajorrǎqi le Ćhavorreça vaj „e Somnal katar o Floreśti”, kaj ol vaslujenǎ mangen pen laθe vi ages pakǎmaça. 

Akana, e bari khangeri and-o stilo nevo gotiko azbal amen andar ornamentoja ćhinde and-o barr, elementoja xurǎjimasqe kaj ućharen e facada haj jekh turno-klopotnica śukar, kaj si les paśe de 25 metroja, kaj brakhǎrel le pakivale manuśen.

---

Xarno istoriko rodinipen

O ansamblul monahalo sas vazdino maśkar ol berśa 1852-1859, p-ol aćhilimata le vazdimasqe kaj sas kerdo kathe and-o berś 1590, katar jekh vorniko le Oprune Themesqo, o Kïrstǎ Genovići. Kadǎ, ke kathe sas jekh mänästirǎ sas ćaćardo jekhtovar and-o berś 1596, kana o Kïrstǎ Genovići dǎs sar dania le somnale kheresqe, o gav Floreśti. 

Sa kadalença, phenel pes ke, o ʒivipen monahalo andar kadala thana si but purano, si ćak de kana sas xulaj o Śtefan o Baro, trujal o berś 1480. 

And-o berś 1991 e mänästirǎ sas palem kerdi mänästirǎ khethani anda ol dajorrǎ.

---

Jekhune bukǎ arhitekturalo

Avral, ol ornamentoja ćhinde and-o barr dikhǒn lokhes, maj but e kuśtik lulugǎne haj ʒometriko bukǎnça, haj vi ol ankadramentoja le felǎstrinenqe. 

Sa kadǎ, o turno klopotnica ćhuto p-e rig katar o sudo la mänästirǎqo dikhǒl anda lesqo ućipen paśe de 25 metroja, savesqo vazdipen inkerdǎs paśe 50 berśa. O turno si vi vov śukar xurǎvdo ornamentojença śukar, sar kodola kaj si p-e facada la khangerǎqi. 

---

O jekhunipen le pikturěnqo

Na pala but vremǎ pala so agordilo o Jekhto Lumǎqo Maripen kerde pen śerutne laćharimata, kana o altaro sas xurǎvdo jekha duvaresqe pikturaça. 

Pala kodoja, maśkar ol berśa 2008 haj 2013, and-o devlikano kher kerdǎs pes jekh bari piktura and-e tehnika fresko, ol piktorǎ kaj kerde buki kathe dindoj jekh śukar ćaćipen le sćenenqe haj le manuśenqe kerde and-ol ranga tate.