Miśto avilen and-o ilo le źudecosqo Bihor, jekh than kaj ol tradicie haj ol gustoja ćajlǎrena tumare xakǎrimata ande verver feloja. Kadava than, jekh xamipen miśto istoriaqo, kulturaqo haj naturaqo, akharel tumen te dikhen jekh simfonia aromenqi haj tradicienqi.
Astaren o ges jekhe xamasa texarinǎqo tradicionalo manreça kerdo and-o kher prospeto, bukǎ andar mas haj thuda kathar, guglǎrdo le avginaça kaj si 100% naturalo katar o Jonuc Popa andar o Spinuś de Pomezeu.
Na xasaren o śajutnipen te dikhen e Pälinkäria andar e Tulka, savi organiziel pimata ćak and-o foiśoro andar e bar, mariklěnça tate, e E bar milajesqi Salonta vaj o restauranto Slavia sa andar e Salonta, thana kaj daśtin te xan ol xamata but laćhe, katar o gulaśo k-o ćeauni k-e marikli slovako.
And-e Oradea, phenas tumenqe te nakhen o prago le restaurantojenqo La nući - prinʒardo vaś ol recete tradicionalo Bihorosqe save si and-o menio - haj To Chefs o than kaj o xaben si kerdo arta.
Dikhen o Komplekso Huta Slavia andar o Śinteu, na numaj jekh popasqo xamasqo verver, ama vi jekh than kaj e istoria le slovaćenqi ʒivdǒl. Kathe daśtin te xan xamata tradicionalo kiravde andar bukǎ le thanesqe, te xan ol mariklǎ kerde ćak and-o asǎv paněsqo nevǎrdo haj kaj ʒal, vaj daśtin te ʒan k-ol atelieroja kaj kerel pes buki le sastreça vaj le stiklaça, sar si e vremǎ. Si jekh śajutnipen jekhutno te phanden tumen la istoriaça haj le bukǎnça le thanesqe.
Ol xamata andar o Bihor si jekh khuvipen perfekto maśkar ol kulture haj ol gustoja. Fiesavi receta, katar e zumi sloväćisko xuxurrença (Hribovika) k-o toćinei kompirěnqo (Polesniak), ćiolento haj gombocǎ khilǎvença, phenela tumenqe pa o gi kadale thanesqo.
Len rig k-ol festivaloja haj ol pjace le thanesqe, sar si o Festivalo le Sarmalenqo vaj o konkurso kiravimasqo le maj laćhe gulaśosqo, kaś te dikhen o barvalipen xamatenqo le thanesqo haj kaś te phanden tumen la komunitetaça le thanesqi. Kadala evenimentoja si barvalimata le thanesqe le Kriśojenqo haj si jekh śajutnipen but baro te barvalǎren tumari eksperienca xamasqi haj kulturalo.
Jekh andar ol maj ćaće eksperience xamasqe saven daśtin te dikhen len kathe si e zumi slovako xuxurrenqi, prinʒardi le anaveça de Hribovika. Kadaja zumi, jekhe tradiciaça purani and-e komuniteta slovako andar o nordo le Bihorosqo, si maj but desar jekh simplo felo xamasqo – si jekh rig andar e kultura le thanesqi haj le tradicienqi xamasqe.
O kiravipen le recetaqo de Hribovika si jekh proćeso savo astarel le alosarimasa le xuxurrenqo śuke. Kadala si thode te kovlǒn kaś te avel len e tekstura haj e aroma de maj anglal. Sode beśen ol xuxurra and-o pani, ol kolompirǎ si uźarde haj ćhinde, haj e purum si ćhindi haj peki lokhes and-o ćiken vaj ulejo. Ol xuxurra paněça si thode and-e piri, khethanes le kolompirença haj ol kondimentoja, haj keren jekh baza thuli haj aromime.
O garavipen kadale zumǎqo si ke kerel pes jekh rïntaśi andar arro haj thud, savo si ćhuto and-e piri kaś te thulǎrel e zumi haj kaś te del la jekh tekstura paki. Kana si gata, e zumi si barvalǎrdi smïntïnaça, haj paruvel la kadja ande jekh felo xalasqo kaj ćajlǎrel tut haj si but laćho. Xal pes tati, e Hribovika si maj but desar jekh zumi – si jekh liipen and-e angali tati le tradicienqe bihoreano.
O than le Kriśojenqo aźukerel tumen te arakhen lesqe garavimata haj te keren gogǎqe animata saven na bistrena len, ande jekh than sar and-ol paramićǎ, pherdo gustoja, arome haj ćaće tradicie.
Linko kopiime! 
0259410181 - Consiliul Județean Bihor
Ʒa maj dur le Google
