Khera tradicionalo and-e lokaliteta Breb

And-o Maramureśo, k-ol pogǎ le Plajenqe Gutïi, ol dromorre andar o Breb si pherde ande fiesavo ges katar ol turiśtǎ kaj kamen te dikhen o śukaripen le gavesqo romïnisko ćaćo, katar o ʒivipen ʒal lokhes, dur katar o phiripen le forosqo.

Ćaćǎrdo and-ol lila inke andar o berś 1715, o gav kerdilo prinʒardp vaś lesqe khera tradicionalo, o peisaźo śukar haj o xurǎvipen popularo kadja de ʒivdo rangǎrdo, jekhutno and-e lumǎ. 

Anglal te ʒas and-o gav, e porta maramureśeano andar kaśt thulo aźukerel le turiśtěn haj phenel lenqe ke aresle kaj trebul. Kathar, o dikhipen si jekh but śukar. Daśtis te dikhes sa o gav, opral savesθe, ivenθe, vazden pen fujorǎ thuvesqe andar ol hornoja le kherenqe. Ol dromorre le gavesqe inkerde pen bibarresqo, haj kadaja buki anel nasulipen le śoferenqe, kana aven ande kadava gav, bistren penqe xolǎ.

Orikana aven, ol turiśtǎ daśtin te zumaven von korkorre o ʒivipen k-o gav. Vaś aver kadaja si te palem ʒiven lenqo ćhavorripen, vaś aver si jekh eksperienca jekhutni haj pherdi gogǎrimata.

Aven k-o Breb, te dikhen fiesave pasosθe o ʒivipen simplo haj śukar. Ol kherore haj ol barǎ kaśtukane paruven othan  ande jekh than paramisǎno. Xakǎrena tumen sar ande jekh boldipen khere, kaj ol gavutne aźukeren tumen sar kana ʒanen tumen de sǎ penqo ʒivipen. 

---

Jekhune bukǎ arhitekturalo

Ol kherorre tradicionalo, khethanes le mare barěnça kaśtukane, keren khera savenqo śukaripen lośarel orso phirutnesqe jakha. And-e lokaliteta Breb arakhena khera miśto inkerde, save dikhlǒn pande jekh arhitektura spećifiko le thanesqe. Ol porte, e bar haj e prispa si kerde andar kaśt, haj ol anekse le kherenqe si thode pe jekh fundacia barrutni haj ućharde śindrilaça.

Ol bare bukǎ le butǎrnenqe maramureśeano, arakhle ande sǎ o gav Breb, si eksemploja biagorimasqe artaqe ćaći romïnisko. Maśkar kadala si vi ol khangerǎ kaśtukane biparuvde, ol prinʒarde porte maramureśeano, ama vi ol khera le gavutnenqe savenqe bukǎ skulptime andar kaśt barvalǎren e arhitektura le vazdimatenqi. 

---

O ʒivipen le gavesqo

E lokaliteta Breb si jekh than kaj e tradicia sas savremǎ inkerdi but miśto. Ol bukǎ le thanesqe sar si e buki le kaśteça, o dulgerito, e tïmpläria vaj o dränicipen le kherenqo, si maj ʒivde akana. Kadja ol manuśa kathar inke maj xurǎven pen ande gada tradicionalo kana keren buki p-o vazo, vaj kana si baroges laiko vaj reliʒioso, kana o xurǎvipen popularo si vareso śerutno haj zorǎrel o spećifiko le thanesqo.  

Ol xamata tradicionalo si jekh cirdipen le thanesqo. Ol ʒuvlǎ kiraven maj but o xaben andar so von keren vaj lenqi ferma haj ćajlǒla tumen te xan andar ol xamata but purane, kerde palal recete ćaće. 

---

Jekhune eksperience

O Breb, jekh andar ol maj śukar gava andar e Romïnia, akharel tut jekhe phirimasθe telal. Kathe pherdǒs savorre zorǎça le thanesqi haj trebal te dikhes sa so inklǒl tut angle!

Kodola saven ćajlǒl len e kultura popularo, e natura haj ol phirimata daśtina te lośaren pen katar o śukaripen le gavesqo barvalo and-ol tradicie haj aćata ʒivde śele berśenθar: kherrore kaśtukane, ol butǎrne popularo haj ol datine haj obićejurǎ kaj keren pen sa o berś, o phiripen le vurdoneça haj le saniaça, vaj phirimata le bićikletaça p-o prinʒardo Drom Zeleno. Sa kadja, e Kreasta le Baśnesqi del kodolen saven ćajlǒl len p-o plaj, peisaźoja sar and-ol paramićǎ, vaś ke si o maj laćho than te phires and-o ilo le naturaqo. 

Jekh läkaśo kultosqo anavdino monumento istoriko si e Khangeri “Ol Sf. Arhangelǎ Mihail haj Gavril” andar o Breb. Vazdini and-o berś 1622, pakǎl pes ke si“e kaśtuni khangeri le maj purane turnoça andar e Romïnia”. Kana nakhes laqo prago, andral śaj te dikhen ol aćhilimata le pikturaqe kerdi and-o śeliberś XVII, haj jekh kuć kolekcia ikoanenqi kaśtukane, haj and-e bar le khangerǎqi arakhen purane truśula ćeltiko andar kaśt.

Maj paśe de jekhe ćeaosθar sas jekh than śerutno vaś o Them le Maramureśosqo haj jekhutno and-e lumǎ, e Limorri Lośali katar e Säpïnca.