O drom le konaćenqo - e komuna Ozun, o gav Bikfaläu

Te telǎras p-o Drom le konaćenqo andar o gav Bikfaläu - jekh gav istoriaça bari, kaj akharel tut ande jekh phiripen ćaćo.

O śukar than gavesqo transilvanisko si o korkorro andar e Romïnia kaj si les kam 40 konaćǎ kerde and-ol sekolurǎ XVII-XIX. Andar kadala, 20 inkerel vi ages e arhitektura oriʒinalo, haj si jekh xamipen strafinalo śukarimaça tradicionalo vi farmeko gavesqo.

E arhitektura le phuvǎnqi andar o Bikfaläu kerdili śele berśenθar, avindoj phangli zorales materialojenθar kaj sas kothe. Ol konaćǎ haj ol khera si kerde but barresθar vaj kärämidaθar, ol tegli si solzǎ, ol berande kaśtesqe si butvar xramosarde le berśeça kana sas kerdo o kher, haj ol udara girimasqe si vi andar sastr forźime.

Dikhesa ke o kulturalo peisaźo inkerel e atmosfera medievalo la Europaqi: e maśkaruni khangeri si trujardi kherenθar, barǎ zarzavatojença, rukha haj umala, haj mai dur zinzǒl o veś. E arhitektura jekhutni le gavesqi haj ol khera miśto kerde sikaven jekh unime lokalitatǎ, tradiciença inkerde barikanimaça. 

Ages, o trajo kathe si jekh khuvipen maśkar ol tradicie śele berśenθar haj e modernitatǎ. Akana, e ekonomia la komunaqi si o keripen le thudesqo vi le masesqo, tha vi bukǎ tradicionalo sar si o bukikeripen le kaśtesqo vi e buki la ćikaça.

O Bikfaläu aʒukerel tut kaj te phenel tuqe ol paramisǎ haj te del tut eksperienca ćaći and-o ilo la Romïniaqo. Ʒa ande kado than śukar haj arakhesa jekh kotor andar e Transilvania kaj inkerel barikanimaça ol aćara haj laqi jekhutni arhitektura.

---

Kaj si haj sar daśtis te areses kothe

O gav Bikfaläu si and-o sudo le Kompartimentosqo depresionaro Sfïntu George, k-ol punre le Plajenqe Boldimasqe, 15 kilometrojenθar katar o Foro Sfïntu George (e reśedinca le źudecosqi Kovasna), 25 km katar o Foro Braśov.

Sar si thovdini geografiko and-e depresiunǎ le Braśovosqi vi ke si trujardi plajença, e lokalitatǎ si la jekh bioklimato sasto, plajesqo, orso turisto kaj avel kathe daśtil te pherel pes psihiko haj fiziko.

E phuv le gavesqi Bikfaläu si le bazinosqi hidrografiko le Lenǎqi Kali.

---

Istoria haj arhitektura

Kerdo Gav Turistiko and-o berś 2012, o gav Bikfaläu si o korkorro gav andar e Romïnia kaj malavas kam 40 konaćǎ vazdine maśkar ol sekolurǎ  XVII-XIX, andar savenθe 20 konaćǎ inkeren penqi forma arhitekturalo d-anglal. Kadala konaćǎ si dikhle sar monumentoja istoriko and-o źudeco Kovasna haj molǎren but arhitekturalo. O baro gin konaćenqo andar o gav Bikfaläu si prinʒardo vi and-e Europa.