E diz Biharia si jekh andar ol maj laćhes inkerde diza medievalo anglune andar amaro them. O zorǎripen vazdino andar maloja phuvǎqe si śukar ke si but baro. Ol riga andar o nordo haj o sudo si po 115 metroja de lungo, haj kodola andar o esto haj vesto po 150 metroja.
Kathe o terno Ladislau beślǎs 14 berśa, and-e dukato bar pesqe dadesqi, o thagar Béla I. Lesqi daj, e thagarnǒrri Richeza, e ćhaj le thagaresqi Miesko I la Poloniaqo, le raśajença la episkopiaqe andar e diz siklǎrde les haj dine lesqe o devlikano pakǎjipen.
Maj palal, sa ande kadava than o thagarorro Ladislau kerdǎs haj astardǎs jekh andar ol maj zorale kampanii marimasqe mamuj ol kumanǎ haj pećeneʒǎ.
Le tuqe vremǎ te dikhes kadala thana, godisarindoj ke san ande jekh than kaj ćaćarel ke pe lesθe ʒivde manuśa vi akana 3000 berśa. E paramići le thanesqi
O lil kaj na ʒanas lesqe xramosarnes, Gesta Hungarorum liparel ke and-e epoka maśkaruni angluni, pe kadala phuvǎ zinzǒlas o dukato le Menumorutosqo, kaj sas les o ćentro tradimasqo k-e Biharia, kaj si akana o źudeco Bihor, haj vi aver thana zorǎrde śerutne k-o Satu Mare (castrum Zotmar) haj Zaläu (Zyloc).
Andar bukǎ informaciaqe sikade k-e ekspozicia E opera haj o kulto le Somnale Ladislauosqo, putardi k-o Palato Episkopalo la Episkopiaqo Romano-Katoliko Oradea aśunas ke: „o dukato la Bihariaqo and-o śelberś XI sas aba jekh treimǎ andar e phuv medievalo le Thagarimasqo la Ungariaqo. Pe kadava themorro beśenas maj but ol xoraxaja, ol darane marimasqe manuśa grastença haj kaj brakhenas ol agora le themesqe. E Biharia sas phuv kaj siklǒnas ol manuśa kaj sas te len o skamin le themesqo, kaj te siklǒn sar te traden o them. O Somnal Thagar Ladislau si ćaćes, o maj śerutno manuś istoriko kaj siklilo ande kadaja „thagarenqi śkoala”, kadǎ sikavindoj pesqo phanglipen spećialo kadale phuvǎnça, haj vi o rolo le Bihorosqo and-o keripen le devlikane kultosqo le somnalesqo inke andar e maśkaruni epoka.”
Korkorutne eksperience
E komuna Biharia si paś-o baro foro Oradea, prinʒardo aba vaś ol but thana turistiko. E istoria la dizaqi Oradea si phangli le ʒivimasθar le Somnale Ladislauosqi, kothe sas kerdo maj akana jekh baro vazdipen, jekh statuja kaj sikavel les les. Sa and-e Oradea daśtias te dikhas o Parko Baroko la Episkopiaqo Romano-Katoliko kaj inkerel pes e biaćhamasqi ekspozicia anda o Somnal Ladislau.
Daśtin te beśen frimi, sa kadǎ, and-e staciunǎ sastǎrimasqi ol Najimasqe Thana Feliks, kaj si na dur katar e Komuna Biharia haj daśtin te lośaren tumen vi andar ol xamata kerde kathe, o Bihoro si prinʒardo anda o laćho haj guglo xaben.
Linko kopiime! 
Ʒa maj dur le Google
