E Kaśkaveawa andar e Prahova - jekh but laćhi buki tradicionalo romïnicko

Linko kopiime!

Tho kaśta p-e jag haj tatǎr ande jekh ćauni o thud abǎ duślo kaθar e grurumni. Ćhe vi kǎgo kaś te keres andar lesθe jekh kaśo guglorro. Kide o kaśo ande jekh vaso haj mukh les te śutlǒl jekh vremǎ. Atunći kana zinzǒl haj daśtis te keres les bidaraqo ke ćhines les, ćhin les ande felǎ sane. Xamie len and-o ćauni and-o pani kiravdo loneça haj bolde len lokhes. Inkal o kaśo haj xamie les miśto haj tho les and-e forma kaś te thavdel sǎ o zero. Tho and-e saramura jekh ges o kiral śudro. Dikh so bidośaqo haj so śukar kerdilǎs. Pala so thos la k-o śudripen, mukhes la k-e thuvarni kaśteça khilǎvinaqo, fago vaj mesteakäno duj ratǎ. Kana inkales la kothar avela la jekh rang źïlto-maronio palo haj avela laćhi xamasqe vaj te labǎres la ande aver recete purane.

Kadaja si e kaśkaveawa de p-e Xarr le Dofteanaqi, jekh truj źïlto haj paki, jekhe gustoça jekhutno haj sar na-i aver. Laqi forma rotundo ïnsemnol o nakhipen le anotimpojenqo, o nakhipen le vremǎqo haj e miśkarea savaxtutni la naturaqi. And-o sung perfekto la kaśkavalaqo kidine pes ol laćhimara andar e Xarr le Dofteanaqi, ol dikhimata sälbatiko, ol luluga vazěsqe, o gi le manuśenqo haj o kaśt le veśenqo, kaj si but kathe.

Paśa o pani Dofteana, and-ol gava Teśila haj Träisteni, ol manuśa ʒangle te inkeren ande penqe gogǎ penqe phuren haj vi ande kultura la xamasqi. Voj phenel pa ol panǎ uźe, pästrävença ruputne, veśa but purane pherde xuxurra vaj verver haj but laćhe bukǎ kerde andar kiral. Vaj ke ʒas te dikhes jekh stïna haj arakhes o maj laćho bulzo kaj ʒal but miśto dikhimatença jekhutne, aćhes k-e pästräväria vaj xas k-e Daj e Lili. Dikhesa ke ol thana haj ol manuśa ćajlǒna tut. Haj trebula te aves pofta ʒivimasqi haj eksperience xamasqe and-o zoralo haj laćho phurdipen plajesqo.

Ol but laćhe xamata spećifiko andar e Xarr le Doftanaqi, kaśkaveawa, xakuska legumenqi, bulzo k-o źaro, kokalo fasuleça k-o ćauni, tokana xuxurrenqi, ćiulamawa hribenqi, mariklǎ kaśkaveawaça, kaśkaveawa xävicaça, guglimata, siropoja vaj e rakia le thanesqi daśtis te xas vaj te pies and-o kher kaj aʒukerel tut le dejaqo Lili. Si o jekhutno Punkto Xamasqo le Thanesqo haj aʒukerel tut te ʒas te xas k-o mezmeri vaj e rǎt, k-o agor le kurkesqo, bukǎnça naturalo le thanesqe.

Haj te aresesa o angloivend p-e Xarr la Dofteanaqi, arakhesa la xurǎvdi and-ol gada jekhe baregesesqo jekhutno - O Festivalo le Kaśkavelaqo. De maj but de 20 berśa kiden pen ol manuśa andar e Dofteana kaś te lośaren pen kaθar e prinʒardi kaśkaveawa, savi, phenen von, na-i nići kaśkavalo, nići kiral. Ama si la vareso andar fiesavi haj śaj ke maj but desar ol duj jekhe thanesθe. Siguro si ke kam savorre butǎrne keren la haj kadja si but verver. Von phenen ke o gusto na-i sar aver haj na daśtis te bistres les o gusto kadale kaśosqo kaj na-i śutlǎrdo, si jekh cïra londo haj thuvǎrdo, si les o sung le lulugǎnqo vazěsqe, haj jekh cïra kätina. Kadja ke san vi tu aʒukerdo te dikhes kadava xaben le thanesqo, savesqe si kerdo jekh baroges kaj inkerel trin gesa p-e Xarr la Dofteanaqi.

Haj te na bistres ke daśtis te ʒives but bukǎ p-e Xarr la Dofteanaqi:

phirimata le bićikletaça vaj o ATVo, phirimata ande thana sar numkaj kathe si, piknikoja but laćhe. Vaj ke uśtes p-o Vïrfo Sekäria kaθar dikhes ʒi dur ol ućimata le plajenqe, mukhes tut tele k-i Len Paltinul - kodova tikno baro bani plajesqo, saves si les ranga sar o smaraldo, vaj dikhes o but phuro Veś Glodeasa - jekh rezervacia veśesqi biphirdo, kaj si fago haj brado haj si kadja verver haj kadja de śukar, haj kathe arakhesa e paćǎ haj o lośalipen le ʒivimasqo.
te ʒas te dikhes verver butǎrne le thanesqe.
O Atelieri le Sïnzienenqo si jekh than kaθar telǎres phares, vaś ke kathe, e Loredana Florentina Klinći lośarela tut pesqe asamaça dudǎrdo, e kolekcia le bukǎnqi purane tradicionalo, o räzbojo le suvimasqo savesθar daśtis te siklǒs te keres buki le bukǎnça kerde vastesθar but laćhes laθar haj varesave butǎrne (gada, ie, kuśtika, biźuterie, khelnǒrre haj but aver.
O Atelieri le skulpturaqo and-o kaśt la druźbaça („Chainsaw carving”) le rromnenqo Gabriel Ćernat haj e Roksana Lukaći, e korkorri ʒuvlǎ andar sǎ o them kaj kerel kasave skulpture. Si jekh spektakolo te dikhes len sar paruven o kaśt ande verver ʒivutre, urśǎ, grasta vaj śośoja.