E khangeri unitariano andar o Sïnväsii

E khangeri andar o Sïnväsii si jekh andar ol maj śukar vazdimata arhitekturalo kathar. Paśal ol prinʒarde haj ol barvale aćhilimata andar e arhitekturaqi istoria, e khangeri inke garavel but phuvǎqe barvalimata kaj daśtinas te keren amen te xakǎras maj laćhes ol evenimentoja andar e maśkaruni epoka angluni andar e Transilvania.

Pakǎl pes ke e khangeri angluni, kodoja pe savesqi fundacia sas vazdini o vazdipen kaj si akana, sas vazdini kana sas kanonizime o thagar Ladislau and-o berś 1192. O gav lǎs pesqe o anav katar o anav kadale khangerǎqo dini le thagaresqe kavalero, Nyárádszentlászló, kaj amboldel pes o Somnal Ladislau katar o Niraź.

Jekh andar paramisǎ phenel amenqe, sa kadja, ke paś-o gav Sïnväsii del avri jekh lenǒrri kaj bućhol e Xaing le Thagaresqi, kaj pakǎl pes ke, kana sas te astarel ʒivutren, o thagar Ladislau hodinisajlo haj pilǎsas andar o pani le xaingaqo. 

---

E khangeri si kerdi andar e nava dreptungiularo, e absida trine rigěnça, inkerdi opre katar jekh korkorro zorǎrdo kilo p-e sud-esto rig. Andar e rig nordo la absidaqi daśtil te ʒal pes and-e sakristia de paśal, kaj, vi andar kadaja, daśtil pes te aresel pes k-o turno jekhe putarde prispaça.

Ol bukǎ tïmpläriaqe kaj si andral si andar ol śelberśa XVII haj XVIII. P-ol panooja andar e opruni rig le bankenqe dikhǒn feri urmi khosle le anglune pikturenqe, ama maj daśtin te dikhǒn vi varesode berśa: 1648, 1694 vaj 1707.

E sinia liturgiaqi haj e koroana le amvonosqi si andar o śelberś XVIII, kaj si but śukar, solduj si palem kerde katar o Ferenc Mihály and-ol berśa 2000.

Jekh aver śukar buki si o kaśtuno udar kaj si p-e facada vestiko la khangerǎqi. Si kerdi andar duj stratoja phalěnqe, kodova andruno si xurǎvdo andar nituirǎ ordonime. P-e avruni rig maj daśtin te dikhǒn ol urmi khosle jekhe xramosarimasqe and-e latina.

And-e absida haj andre and-o triumfosqo arko daśtis te dikhes e tenkujala piktime and-o stilo gotiko paluno, inkerdi ćhindi kotora ʒi ages, kaj biblikane manuśa sas kerde lokhes haj kamipen. Jekh kotor xurǎjimasqo kurpenenqo xulavel e galeria apostolesqi katar e pïnza la boltaqi kaj sas xurǎvdi traforosqe imitaciença, o fundalo si piktime sa kadja and-o albastro haj phanglo ćerxeněnθar śov kolturença.

---

Jekhune eksperience

Paś-e khangeri kaj si purani 800 berśenθar si e śkoala le gavesqi, purani vi voj de maj but de 100 berśa. Ol manuśa kaj kamen kadava gav kerde kathe jekh muzeo la śkoalaqo angluni haj jekh ateliero 13 tradicionalone suvimasqe vurdonença.

Ol säli klasaqe fal ke si paxome and-ol berśa kaj sas akana 40 berśa, vi le mobilieroça vi savorre bukǎnça siklǒvimasqe kodole vremǎqe: kaśtune banke skaminença kaj mukhen pen, o abako, o phuvǎqo globo le themença kaj sas atunći, e harta le themesqi umblavdi and-e karfin haj vi jekh kravata pionierosqi angruśtikaça.

Ol manuśa le thanesqe kamen kaj atunći kana aven ol manuśa te dikhen e purani khangeri te aven te dikhen vi kadava muzeo śkoalaqo haj te keren penqe vremǎ te siklǒn vi te suven jekh kovoro tradicionalo, sosqe kadava than si anda lenθe o ʒivipen le pakǎjimasqo haj la kulturaqo le tikne gavesqe xasardo maśkar ol plaja.

Kana keren tumenqe drom kathar, phenas tumenqe te keren programarǎ k-o muzeo vi k-e cesätoria k-o telefono 0741 673 169. Ovena lośale, ćaćes!