Trujal zinzol o vazi. E parni khangeri, laqe turnoça sano, phenes ke si jekh lebäda kaj ʒal p-o pani zeleno le Vazěsqo Vestiko. Dikhli inke andar e vremǎ maśkar ol marimata, e khangeri andar o gav Käpät, e komuna Rakovica, kerdili jekh andar ol jekhto khangerǎ kasave andar o Banat, savi si tal-o arakhipen le Krisaqo le monumentojenqi istoriko.
Astarindoj le berśeça 1645 voj „barilǎs” fiesave śele berśeça savo maj delas la vareso. P-o kaśt purano daśtis te drabares laqe jekhto berśa. Kathe o piktori sas śak e vremǎ savi mukhlǎs palal urme haj simboloja saven kire jakha, phirtunea, zumavena te xakǎren len uimime lenqe garavimatenθar.
So kerel la verver si e buki ke ande kadaja rig le themesqi inkeren pes maj cïra de deś khangerǎ kaśtukane vazdine and-e tehnika spećifiko le Banatosqi. Sar kerel pes, k-ol vazdimata kerde andar kaśt pand-o lavǎripen kadale tehnikaqo, thol pes jekh tenkuiala andar phuv xamime phuseça vaj phusa ćhinde.
Na sas padimentime phalěnça, numaj jekh tikno podo thodo karing o naoso, angl-e meseli le altarosqi. Vaś kadaja, kana ʒasa andre, avela tut e phuv tal-ol punre haj o ćeri opral: de p-e bolta piktime ćerxenǎnça haj ïnʒerença, andar o maśkar le ćeresqo, o Isus baxtǎrel tut. San ande jekh than kaj si tal-o semno devlikano!
Xarno rodinipen istoriko
Kana sas vazdini na ʒanel pes, ama si ipoteze pa kadaja. Misalǎqe, ol rodinimata dendrokronoloʒiko sikaven o berś 1645, kana sas paruvdo o than le vazdimasqo. Ol teorie sikaven ke pala o berś 1685 kerde pen bukǎ k-ol patuma, e struktura haj o turno le khangerǎqo. O berś 1778 si sikavdo and-o inventaro khangerikano andar o berś 1816 sar o berś kana sas vazdino o läkaśo haj kana kerde pen ol pikture andral.
Sa kadja, e forma d-akanara andral o läkaśo rugimasqo si kam d-andar e dujto paś le śeliberśesqi XVIII vaj katar o astaripen le śeliberśesqo XIX.
Kadja, vi kana ol pakǎimata pala o momento kana sas vazdino o monumento ekleziastiko si but, so si ćaćes si ke kadava sas vazdino varekana maśkar o śeliberś XVII haj XIX.
Bukǎ arhitekturalo
O läkaśo kultosqo si vazdino andar kaśt steźarosqo haj si les jekh struktura inkerimasqi kerdi andar stïlpǎ vertikalo, kaj bućhon käcei. E khangeri si kerdi pala o plano arhitekturalo tradicionalo, haj si xulavdi and-o pronaoso, naoso haj altaro.
Andral, o pronaoso si xulavdo le naososθar pande jekh parapeto andar phalǎ, trujardo duje kilenθar kaśtukane. Śaj te dikhel pes ke o ikonostaso si les jekh ćhinipen karakteristiko le barokosqe popularo bänäceano, buki arakhli butvar k-o frontono le kherengo gavutne.
Sa kadja, e piktura sikavdi p-o ikonostaso si kerdi trujal o muj ćentralo le Xastrajtoresqo, kadja ke, ande zervi rig haj ande ćaći rig arakhas medalionoja ovalo kaj dikhǒn ol apostolǎ.
Jekhutne bukǎ kaj ʒives len
Kana areslǎn and-o kadava than le themesqo, phenas tuqe te ʒas vi k-e staciunǎ klimateriko Buziaś, kaj si paśe. Kathe daśtisa te beśes vestes haj te lośares tut katar ol laćhimata le paněsqe tato, barvalo and-ol mineraloja haj prinʒarde vaś vaś lenqe efektoja sastǎrimasqe.
Linko kopiime! 
Ʒa maj dur le Google
