Tradicionalutne gospodärie and-o Gav Źurilovka e familia Sterea Marian

K-e porta la Delataqi la Dunäraqi si Źurilovka, e lokaliteta le rusenqo lipovenea, jekh komuniteta etnikati phurani pala’ol thana le Dobroʒeako. Manuśa but śukar maśkar lenqi zor te aćhon punrenθe anglal ol vaxta, ol lipovenea avile p-o rumunikano than te arakhen penqo kher. Naśavde vaś lenqi pakiv palal e skisma religikani andar e Rusia le śeberśesqo XVII-to, von thovdine pen kathe, inkǎrindoj penqe aćarimata katar lenqe phurane dada. Von si śaj jekh andar ol bukǎ andar savesθe k-i Źurilovka xakǎres and-e aver fǎlo o vaxt, sosqe ol lipovenea den pakiv ol baredivesa ortodksea pala’o kalendaro iuliano, dekalime e 14 divesença desar o kodova gregoriano. 

Lenqe paramićǎ si but thaj den gosi orikasqe kaj kamen te aśunen len! 

Phenas tuqe ke kathe na xasares o vaxt, sosqe aćhǒs jekh vrjama suspendime sar and-e jekh fotografia rangǎrdi thaj lośali, thaj o aćhipen daśtila te avel bikindi katar o thanutne sar suveniro. 

Palal ol tradicie thaj e thanesqi historia kathar aśunen nu numaj katar ol ruśea lipovenea, tha’ vi katar duj artistea fotografea save alosarde te beśen kathe and-e kadaja komuniteta, kaj bućkǒn Marian thaj Daniela Sterea. Von si kerdinitorea ”Lipovenesqo”, jekh projekto maśkar savesθe kerel pes prinʒarde p-ol but prinʒrade manuśa astaren maćho, ol but laćhe gospodinea thaj lenqe aćarimata śukar. 

Arakhes len and-e lenqi but śukar gospodäria pala’i strada 1 mai, gin 40, kaj malaves tut le e so maj ververutne ʒivutrença, katar ol buznǎ, ʒukela, mǐce, khajnea, racea ʒi ke duj…alpakale śukar, Pićiu thaj Lulu. Thov tut te keres jekh sesiunea foto bi bistaripnasqi. 

O kher sas kerdo pala’i misal jekhe phurani kerhaneaua.  

Von vazdine penqe jekh kherorro simplo parnesθe zeleneça, avindoj jekh prispa bari. E ućhardi si o stufo, thaj ol duvala sas vazdine andar kiripićea, sosθar kamle te inkǎren birimome o sikavipen tradicionalutno la lokalitetaqi. 

E zona si pherdi surprizenθar, gunʒanθar, aromenθar. Thaj xamata sar o borśo maćhesqe, o storćeago, ol skoićea thaj o maćho p-e plita, kerde palal ol recetea tradicionalutne le ruśea lipovenea, si jekhutne. 

Tha’ e Źurilovka si specialutni vi maśkar aver atrakcie, sar avela phirimata la barkaça, bićikletaça vaj le kajakoça, drumecie karing thana but śukare sar avela e Diz grekikani-romaniko Argamum vaj o Śero Dolośam, telǎrimata le śalupaça karing e Portica, e śukarbi staciunea kaj si maśkar o Lako Golovica thaj e Kali Derǎv. 

Si jekh than pherdo aćharipnaça kaj del giravipen vi k-o guglo pani vi k-o londo pani la deravǎqo, jekh than kaj e maviz si and-e e so maj ververutne nuance thaj lośarela tut sigo.