Kana o Drom le Kulenqo phenel tuqe paramićǎ save ćajlǒn tut, atunći trebul te ʒas te dikhes e kula Glogoveanu. Pakǎl pes pa laθe ke si kerdi maj anglal savorre kulenθar, anda kodoja ke o nivelo o oprutno sas vazdino pe jekh pivnica kaj sas maj anglal, zorǎrdi haj vazdini and-o śeliberś XVII, zidurença thule de 1,5 metrǎ. Kadala si la duj thana kaθar ʒas avri garavdes haj galerie telal e phuv kaθar daśtis te naśes. Maj palal, and-o śeliberś XVIII sas vazdino o etaźo.
Voj si sar jekh kher boiericko, vazdini and-o maśkar jekhe barǎqo. Laqo śukaripen haj laqi istoria khuven pen but miśto haj daśtis te dikhas kadaja buki ages. Sas śerutne manuśa save sas kathe, o Mihaj o Viteazo, o Tudor Vladimiresku vaj o Basarab o Terno, ol bukǎ pherde kuraźo kadalenqo sas inkerde and-ol paramićǎ le gaʒenqe.
O vazdipen sas labǎrdo maj bute bukǎnθe haj na numaj sar kher kaj beśes, haj si les telal lesqe duvara but paramićǎ save sa sas phende, save na aresle paramićǎ le thanesqe. Pal-o dujto lumǎqo maripen, kadava sas kher phurenqo, tabära milajesqi vaś ol lićeenǎ, internato vaś ol ćhavorre, dispensaro, biblioteka, magazia le Kooperaciaqi vaś o Konsumo, sala klasaqi, muzeo istoriaqo haj sas lino kaθar e administracia le Kombinatosqi Miniero Motru.
Kirre jakha daśtin te dikhen la ande maj but feloja haj o vak kadale kulaqo daśtil te avel les maj but paruvimata. Te aves te dikhes la si te aśunes so si la te phenel tuqe. E paramići le thanesqi
Ol paramićǎ phenen pa sar o vazdipen si les jekh than garavdo kaj te naśes. Kathe sas jekh śopni garavdi palal jekh parǎta thuli, kaθar delas pes tele and-e pivnica, kaj sas jekh galeria telal e phuv andar savǎθe astarenas ol tuneloja vaś o inkalipen avri le manuśenqo kana sas jekh pharipen. Andar kadala jekh ingerelas k-o pani Motru haj sas labǎrdo kaθar o Basarab o Terno, raj le Rumunikane Themesqo, savo nakhlǎs le xoraxajença kaś te naśel kodolenθar save kamenas te mudaren les, ta sa sas astardo kana inklelas andar o tunelo.
Maj phenel pes ke o Mihaj o Viteazo lośardǎs pes k-e Glogova kana kerdilǎs o bano la Kraiovaqo, vaj ke o Tudor Vladimiresku beślǎs ande kadaja kula sode sas terno.
Bukǎ arhitekturalo
Thodi pe ući terasa le Motrosqi, ande jekh parko but śukar, e kula dikhǒl lokhes maśkar ol zidoja kaj si sar jekhe dizaqe. Kadaja miazel but jekhe konakoça barvalenqo, haj si jekh vazdipen but śukar sar dikhipen haj baripen.
E Kula Glogoveanu si la jekh parteri ućo, zorǎrdo jekhe but bare pivnicaça, haj si la duvara andar kärämide phabarde haj barra lenǎqe.
Kana dikhes k-o nord-esto, karing o sud-vesto, kaθar o Kher Glogoveanu kerelas pes jekh buxlo dikhipen pa e Xarr le Motrosqi, kaθar daśtinas te aven ol duśmanǎ xoraxaja.
Jekhutne bukǎ kaj ʒives len
Te kames te keres maj bari kirri eksperienca le dikhimasqi kadale kulaqi, paśe laθe si vi e Kula Kucui andar o gav Brośteni, savi si de andar o berś 1815.
Sa kadja, kodola saven ćajlǒl len te dikhen khangerǎ daśtin te nakhen vi kaθar e Khangeri o Sfïnto Nikolae, vazdini maśkar ol berśa 1730-1762 vaj k-e Mänästirǎ Tismana, o maj purano than kälugärenqo andar e Oltenia.
Linko kopiime! 
Ʒa maj dur le Google
