E Diz Kosteśti-Ćetäcuie

E Diz Kostećti-Ćetäcuie pa savǎθe phenel pes ke si o maj purano zorǎripen andar ol Plaja la Oräśtiaqe, del tut o śajutnipen jekhe phirimasqo but śukar and-o but purano nakhipen la Daćiaqo. 

And-o I-to śeliberś anglal o Hristos, kathe śaj ke sas e kapitala le thagarimasqe daćiko kerdo katar o Burebista. Pala kadaja, e Diz Kosteśi-Ćetäcuie sas jekh than strateʒiko śerutno vaś o arakhipen le śerutne dromesqo karing e Sarmizegetusa Regia. Ages, lesqe peravimata vakeren le manuśenqe pa o barikanipen haj o zoralipen le poporosqo dako angla ol pharimata katar ol romanǎ.  

O Plaj Ćetäcuia, alosardo gogǎça, delas jekh dikhipen but laćho karing e Xarr le Mureśosqi. Maj but, o than sas brakho but miśto katar e natura, maśkar ol pante abrupto andar e rig oprutni le plajesqi. 

Ol peravimata le purane turnojenqe, ol zidoja andar blokoja bare kalkarosqe haj ol platforme marimasqe, sikaven tuqe so laćhe gogǎ sas le vazdinitoren d-atunćara. Ol śtar temploja patrulatero kaj sas andral o vazdipen vaj paśa lesθe, kerel o dikhipen jekh ćivilizaciaqe jekhe niveloça but ućo haj jekh pharipen le giesqo daćiko. 

Kana aresesa kathe, avesa siguro ke azbajlǎn na numaj jekh than turistiko interesant, ta vi jekh kotor śerutno andar o tezauro le prǎphurenqo daćǎ. 

Tromav te prinʒares maj but haj te ʒas p-o firo la istoriaqo! 

---

Bukǎ arhitekturalo

Ol bukǎ vaś o vazdipen la dizaqo Kosteśti-Ćetäcuie kerde pen maśkar o agoripen le II-tone śeliberśesqo anglal o Hristos haj o astaripen le III-tone śeliberśesqo palal o Hristos. 

E tehnica le vazdimasqi le zidurenqi si elenistiko. Ol zidoja sas kerde andar blokoja kalkarosqe thode ande rïndoja orizontalo jekh pala avresθe. Ol duj riga de avrǎl le vazdimasqe sas phandle maśkar penθe kilença kaśtukane, save sas thode k-ol śere ande thana kaj bućhon phurǎ (babe). Maśkar lenθe sas jekh pherdipen phuvǎqo haj barresqo. K-o vazdipen le zidurenqo śaj ke line rig vi butǎrne grećǎ. 

---

Kuć bukǎ

Andar ol artefaktoja arakhle k-e diz Kosteśti-Ćetäcuie phenas numaj varesave: bukǎ andar ćeramika, pharimata vaś o räzbojo le suvimasqo, ol fusaiole, bukǎ sastrutne vaś ol bukǎ le phuvǎqe, ama vi and-ol atelieroja kaj kerelas pes buki le kaśteça haj le sastreça, arme haj sirimǎ grastenqe. Maj si vi biźuterie kerde andar rup vaj bronzo haj ol kopie le thanesqe pala ol monede romano vaj grećicko. 

Avrǎl ol bukǎ kerde le manuśenθar le thanesqe, arakhle pen vi bukǎ vaś o importo, sar si ol rećipiente vaj ol piese mobilierosqe andar bronzo, kaj but andar lenθe si andar o than mediteraneeano.

Kana kames te dikhes varesave andar ol artefaktoja arakhle k-o Kosteśti-Ćetäcuie, ʒa haj dikh o Muzeo la Ćivilizaciaqo Daćiko haj Romano andar e Deva. 

---

Bukǎ jekhtune kaj ʒives len

Jekhe ućimasθe de 750 metrǎ,  k-o zorǎripen katar o Kosteśti-Blidaru aresel pes maj phares, ama na-i kadja de phares te na  „mares”. O uśtipen si kam jekh ćeaso, ama kana areses k-e diz na fala tuqe nasul ke sas tuqe phares. Arakhesa jekh arhitektura militaro but phari haj jekh tehnika oriʒinalo vazdimasqi le zidurenqo, kaj bućhol murus dacicus.

Kam 20 kilometrojenθar katar o Kosteśti si e Sarmizegetusa Regia, e kapitala le thagarimasqi daćiko, kaj avesa uimime katar e arhitektura reliʒioso but bari andar o than o sfïnto.

Kana dikhlǎb o than katar e Grädiśtea le Plajesqi, ʒa karin e Oräśtie haj ker jekh popaso and-o Ćentro istoriko le forosqo.