Ande orso anotimpo aresen k-o Braśov, o foro azbana tumen lesqe śukarimaça haj lesqe rangěnça kaj xuraven sǎ: ol plaja, ol purane khera, ol droma...
And-o ilo la Romïniaqo, and-e kurbura le arkosqi Karpatiko, kadava purano foro vechi si les jekh barvali istoria haj si ages jekh andar ol thana turistiko kamle and-e Romïnia. Kathar nakhen ande sarkon ges kam 150 trenoja kaj ʒan karing verver thana andar amaro them vaj andar aver thema: Viena, Budapesta, Praga, Munchen.
Kerdo katar ol koloniśtǎ saśǎ, o Braśov sas organizime katar ol ʒermanǎ, o foro si vi akana jekh than ekonomiko haj kulturalo śerutno andar amaro them.
Ama so phenel e paramisi la Dizaqi Korona? Vazdini paś-e Kali Khangeri, k-ol punre le plajesqe Tïmpa, kadaja sas kerdi duvarença brakhimasqe, turnojença, bastioanença haj śtare udarença. Ol duvara de karing ol plaja aćhile opre haj si ages thana istoriko, turistiko haj kulturalo. Andar odola oxto bastioanǎ, maj inkeren śtar, duj lenθar kerde thana muzealo.
O ilo la Dizaqo, e Khangeri Kali si jekh andar ol maj bare vazdimata gotiko andar e Transilvania. Kerdi palem pal-o baro jag diipen andar o berś 1689, kadaja lel andral bukǎ gotiko, kaj den la jekh śukaripen laqo. Kathe keren pen śukar orgaqe konćertoja, pala savenθe, anglal, aśundǎsas pes ʒi k-e Viena.
O foro sas jekh andar ol maj bare ćentroja bukǎqe andar kadaja rig la Europaqi. Ol aćhilimata kodole berśenqe maj si and-e arhitektura, ol muzeoja haj ol droma śukar le forosqe.
Jekh vizita and-e purani diz azbala tumen! O ʒivipen haj o ternipen si ol maj laćhe bukǎ kadalaqe ages.
Thana turistiko
O Braśov si jekh andar ol thana turistiko butlaćhe andar amaro them, kaj si pherǎrdo thanença kaj te dikhes len.
Ol monumentoja istoriko dikhes len orkaj, kadja ke, akharas tut te dikhes o Bastiono le Khuvǎrnenqo, ages kerdo muzeo, o Bastiono Graft, o Udar Śkeji andar o berś 1827 haj inkerdo sa, haj vi o Udar la Ekaterinaqo, andar o berś 1559, o korkorro udar medievalo kaj aćhilo monumento ʒi ages. Maj but, kathe dikhesa vi ol Troice andar o Śkeji, ćaćarimata la tradiciaqe ortodokso kathar, e maj purani lenθar si inke andar o berś 1291.
O Turno Parno haj o Turno Kalo si duj thana kaj trebal te dikhel les musaj. O Turno Parno sas vazdino maśkar ol berśa 1460 haj 1494 haj si les panʒ etaźoja, haj kadja si o maj ućo than zorǎrimasqo andar o Braśov. And-o 21 aprilie 1689, jekh jag diipen zoralo sas and-o maśkar le forosqo, haj o jag diinpen phaberdǎs vi o Turno Parno, kadava sas palemkerdo ćak and-o berś1723. O Turno Kalo sas kerdo kana sas kerdo vi kodova Parno, haj lesqo anav avel ćak katar e jag andar o berś 1689, sosqe e jag haj o thuv kalǎrdǎś lesqe duvara.
Ol muzeoja si vi von but, haj kathe daśtis te dikhes o Muzeo Istoriaqo, and-o Kher le Sfatosqo, vazdipen kaj si les maj but desar 600 berśa haj kaj, berśenθar sas ol kidimata le maʒistratosqe, le forosqe konsiliosqe haj line pen dećizii śerutne anda o Braśov. Maj but, kathe krisinenas pen bukǎ, haj andar o berś 1542 and-o vazdipen andar e piaca le forosqi kerelas pes tǎtro katar ol elevoja le gimnaziosqe Honterus.
Aver muzeoja kathar, kaj nu trebal te xasares len ande kiro phiripen, si vi o Kher le Mureśenenqo, o Muzeo le jekhtone śkoalaqo lahko andar o Śkeji, kaj daśtisa te dikhes o jekhto lil dino avri and-e lahkani ćhib, o Muzeo Artaqo, o Muzeo Etnografiaqo, o Muzeo le Forosqe Ćivilizaciaqo haj o Muzeo le Liparimasqo andar o Komunismo.
Sa kadja, kana plaćal tut o turismo khangerikano, and-o foro Braśov daśtisa te dikhes but thana. Kathe, paś-e KhangeriKali maj daśtis te dikhes vi e Khangeri o Somnal Nikolae andar Śkeji Braśovosqe, e Khangeri o Somnal Bartolomeu haj e diz de p-o Plaj Śprengi, o Zorǎripen haj e Khangeri o Somnal Martin katar ol punre le Dizorrǎqe Plajesqe, e Khangeri o Somnal George, haj vi e Sinagoga Neologo.
Na xasar nići o prinʒardo drom Sfoaraqo, prinʒardo vaś ke si jekh andar ol maj tang droma andar e Europa.
Butʒangle manuśa
But manuśa prinʒarde śerutne biandile, vaj ʒivde, varekana, k-o Braśov.
Maśkar kadala, phenas pa o Johannes Honterus, umanisto saso haj reformatoro devlikano le saśenqo andar e Transilvania. Vov biandilo k-o Braśov and-o berś 1498, haj ande lesqo ʒivipen kerdǎs o ʒimnazio sasisko andar o Braśov, and-e bar le Kale Khangerǎqi. Ages, o ʒimnazo si o Koleʒio Themutno Johannes Honterus.
K-o Braśov beślǎś ande jekhto paś le śelberśesqi XVI vi e Apollonia Hirscher, jekh andar ol maj barvale haj maj zorale manuśa le Braśovosqe kana sas phares kaj jekh ʒuvli te sikavel pes, kana ol afaćeri haj e politika, sas feri andar ol murśa. Kadaja sas jekh negustorka kaj, pala so laqo murś mulo, o źude Lukas Hirscher, lǎs lesqi afaćerǎ, kerindoj but buki kaj kerdindoj pesqe relacii komerćialo vi and-e Austria haj Turćia kaj si ages. Laqi influenca sas jekh śerutni k-o Braśov, dindoj le forosqe vi love, haj vi o vazdipen o Kher le Negustorenqo.
Aver manuś butʒanglo si vi o Dumitru Dorin Prunariu, biando k-o Braśov and-o berś 1952, kana bućholas o Foro Stalin. Kadava sas o korkorro kosmonauto lahko, haj and-o berś 1981 kerdǎs jekh zboro spacialo 8 gesa haj avilǎs o 103-to manuś kaj areslo and-o spacio kosmiko. Ages, o Prunariu si ʒeneralo-lokotenento kaj na maj kerel buki le Aeriano Zorǎnqo Lahkane. Vov kerel buki k-e Asoćiacia Lakha vaś-e Tehnoloʒia haj Industria Spacialo – ROMSPACE, si les verver funkcii haj si spećialisti and-ol bukǎ spacialo ande verver organizacii internacionalo.
Linko kopiime! 
Ʒa maj dur le Google
