O Kastro Romano Katar E Draźna Opruni

K-e Draźna Opruni xramosardǎs pes jekh patrin śukar andar e but purani istoria, ke kathe sas, maśkar ol berśa 101 haj 117/118 palal o Hristos, jekh andar ol maj śerutne baze marimasqe romanǎ andar e Muntenia. Miśto thovdino strateʒiko, o kastro romano katar e Draźna Opruni sas but śerutno ke brakhelas kaj kontrolilas o śerutno drom, kaj phandelas e Teluni Dunärǎ katar o sud-esto la Transilvaniaqo, andar o paso katar e Tabla la Buciaqi.

Jekh andar ol maj śukar arakhimata phuvǎqe katar e Opruni Draźna si o vazdipen  monumentalo, kerdo andar barr haj kärämida, kaj sas les sistemo tatǎrimasqo ćentralo hipokausto. Kadava śaj ke sas o kher le garnizoanaqe komandantosqo, prinʒardo tal-o anav praetorium.

Trebal te dikhes kadava vazdipen ćaćes śukar! Avesa azbajlo katar o ʒanglipen le arhitekcenqo haj le vazdinitorenqo andar kodola berśa!

O Kastro katar e Opruni Draźna nakhlǎs andar duj kotora vazdimasqe. Jekh, śaj ke and-e toamna-ivend le berśesqo 101 palal o Hristos, sas vazdini jekh struktura palisada, jekhe śancoça haj jekh valo phuvǎqo, kaj inkerdǎs ʒi k-o agor le dujtone marimasqo de maśkar ol daćǎ haj romanǎ.

O dujto kotor vazdimasqo, kana kerdǎs pes jekh duvar dujuno barresqo 176 × 233 metrojenθar, inkerdǎs maśkar ol berśa 106-117/118 palal o Hristos.

E tabära marimasqi tholas khethanes kam 1000 soldacǎ andar ol Leʒiuni I Italika, V Maćedonika, XI Klaudia Pia Fidelis haj e kohorta I Flavia Kommaʒenorum.

O zorǎripen sas les ol andrune duvara andar barr, haj andral sas vazdimata monumentalo, sistemojença tatǎrimasqe, paněsqe ingerimasqe kaj vaś-e kanalizarǎ.

Śak ke o kher le komandantosqo (praetorium) si rigǎrdo and-e 5 livnǎ xulavde barresqe kalkarosqe duvarenθar vaj kärämidaθar, podelojença mortarosqe inkerde p-ol pili le hipokaustosqe. E śovto livni, e baja, sas la jekh bazino śopněnça haj jekh bazineto kolmatarǎqo. O śerutno sistemo tatǎrimasqo brakhelas o bazino, e baja haj e linvi sud-vestiko. P-e rig sudiko le vazdimasqi sas aver duj tatǎrimasqe instalacii.

K-e Draźna, daśtis te prinʒares e arhitektura tradicionalo de p-e Xarr le Telǎźenosqi, and-e komuna arakhindoj pen varesode khera monumento istoriko, andar o agor le śelberśesqo XIX haj o astaripen le śelberśesqo XX. Jekh vazdipen tradicionalo andar e Draźna si vi o Asǎv paněsqo Warthiadi, kaj avilo prinʒardo and-ol filmoja amare themesθar „ol Haidućǎ le Eftatone Grastenqe” haj „o Boldipen le Vlaśinenqo”.

Sa and-e Draźna arakhesa purane khangerǎ haj truśula barresqe, ama vi jekh andar ol frimi reśedince xulajenqe andar o Them Lahko, inkerdi sar sas anglal - o Kastelo Filipesku-Kretzulesku.