E Khangeri kaśtukani „Ol Sfincă Trin Jerarhă” andar o Goieśti

Sanas dajekhvar opre p-o plaj opre, k-e Vidra Oprutni? Anesa tuqe gogi e prinʒardi gili te telǎresa pand-ol Plaja Apuseni haj si tut o śajutnipen te dikhes e khangeri kaśtukani le hramoça „Ol Sfincǎ Trin Jerarhǎ” andar o Goieśti. Pakǎl pes ke si e maj śukar khangeri le Transilvaniaqi haj jekh andar ol maj kuć monumentoja arhitekturaqe reliʒioso andar e Romïnia. 

O monumento uimiel maj but pand-o kućipen but baro le pikturaqo andral haj śe ikoanenqo. E piktura, kerdi and-o berś 179, si e opera le Simionosqi Silaghi andar o Abrud, kaj bućhol „o Zugravo le Apusenenqo”. E naturalecea le manuśenqi, ol rnaga save khuven pen but miśto, ama vi o jekhutnipen haj o ćaćipen le sćenenqo sikavde, si rig andar e khangeri kaśtukani Goieśti, jekh ćaći kapodopera le artaqi popularo romïnisko.

Aćhesa e jehktovat and-o pridvori, kaj dikhesa ol ikoane haj vi jekh śukar poezia vaś e khangerorri. Phenel pes ke kathe, maj anglal, ol mocǎ uźarenas vaj paruvenas penqe podemata prafosθar atunći kana xulǒnas de p-o plaj, k-e sluźba kurkesqi haj kana sas baroges. 

Kana aves te dikhes e khangerorri andar o Goieśti, xakǎresa tut vi tu sar atunći kana si baroges. Haj vaś ke san p-e phuv le Apusenenqi, maśkar o Plaj Gäina haj e Peśtera Skäriśoara, daśtis te lośares tut jekhe phirmasθar but śukar! 

Vazdini pe jekh temelia andar bare barra barresqe lenǎqe, e khangeri si la jekh plano dreptungiularo haj jekh turla pa savi pakǎl pes ke si e maj ući andar o than le plajenqo Apuseni.

O vazdipen sas thodo ande kotora pala jekh aćar kadale thanenqo, kadja ke „e khangeri le murśenqi” si angla o läkaśo, haj e „khangeri le ʒuvlǎnqi” palal, kathe o than si maj kalo haj maj tang. Ol duj thana si xulavde jekhe duvaresθar kaśtukano saves si les duj putarimata, sar duj felǎstrina. O giripen and-e khangeri le ʒuvlǎnqi haj le murśenqi kerel pes vi voj rigaθe, pe duj udara verver. 

Andral, „e khangeri le ʒuvlǎnqi” si ućhardi jekhe tavanoça vorto, haj opral o naoso haj o altaro si bolte semićilindriko.  

Maśkar ol bukǎ andar e khangeri save sikaven jekh kućipen artistiko but baro, trebul te phenas pa e piktura andral, haj vi ol ikoane thagarikane, haj savorre si d-andar o śeliberś XVIII.

Kadja, o kandelabro kaśtukano andar o berś 1791 si vi vov jekh piesa savi sikavel intereso baro, haj vi ol lila purane śele berśenθar, e toaka sastrutni la khangerǎqi haj ol kudunǎ ćhorde k-o Sibio and-o berś 1923. 

Kana areses and-ol Plaja Apuseni, si tut o śajutnipen te dikhes e natura veśutni, kaj uimiel tut laqe peisaźojença but śukar. Das tut varesave andar kadala śukarimata: Keile Väii Morii, e Kaskada Piśoaja, e Peśtera o Gecari katar e Skäriśoara, ama vi o Plaj le Melćença, kaj si kokilie melćenqe barrutne, purane na maj cïra de 65-70 milionǎ berśa. 

Haj kodola save kamen te ʒanen maj but pa o „Kräiśoro le Plajenqo”, o Avram Janku, daśtin te dikhen e Khangeri andar e Vidra kaj sas boldo vi o Komplekso Muzealo Avram Janku, kaj si o kher kaj beślǎs o bidaraqo manuś le mocěnqo.