E KAŚTUNI KHANGERI „OL SOMNAL ARHANGELǍ” ANDAR O ROGOZ

Kerel vìzita

Linko kopiime!

Arakhes la and-o gi le Themesqi Läpuś. Laqe turlaça śukar, kaj vazdel pes karing o devel, dindoj tut o falipen ke si but bari, e kaśtuni Khangeri „ol Somnal Arhangelǎ” andar o Rogoz nakhlǎs de 350 berśenθar. Sas vazdini and-o berś 1663 andar kaśt ulmosqo, and-o than jekhe khangerǎqo maj purani dini jag le tätarěnθar duje berśença anglal.

Ages sam angla jekh monumento arhitekturaqo khangerikano but śukar, ćaći „katedrala kaśtuni”, kaj o gotiko apusǎno ćhavorrikano khuvel pes but śukar la ortodoksiaça tradicionalo lahïkani.

Avesa azbajlo katar o ʒanglipen le sade manuśesqo, sikavdo katar e simbolistika le bukǎnqo dekorativo kaj den jekh śukaripen verver le somnale khangerǎ. O motivo le ćhinde śelesqo vi le rozetěnqo, ol 125 śere grastenqe ćhinde k-ol agora le berandesqe kaj keren ol konsole, ol śere guruvesqe si feri varesode andar ol ornamentoja kaj trebal phende.

But kuć si vi e piktura andruni. Vi ke si ćhavorrikani , kadaja del le manuśesqe kaj dikhel la jekh xakǎripen sadimasqo, ćaćimasqo haj bare lośaqo.

Kana kames te aves rig andar ol prinʒarimata purane haj te des śukaripen le gies truśalo śukarimasθar, haj ta dikh e kaśtuni khangeri „ol Somnal Arhangelǎ” andar o Rogoz!

Xarno istoriko rodinipen

And-o berś 1661, e khangeri purani le gavesqi sas dini jag katar ol tätarǎ kaj avile pala o thagarorro Joan Kemény, pala savesθe ʒanenas ke beślo varekaj paśa o Läpuś, ande pesqo drom karing o Maramureś. Kadaja buki kerdǎs le pakivalen ortodokśǎ te vazden jekh nevi khangeri. E kaśtuni khangeri kaj bućhol „ol Somnal Arhangelǎ Mihail haj Gavril” sas vazdini and-o berś 1663.

Barvalimata but kuć

Ol duvara la khangerǎqe si xurǎvde sǎ sćenença biblikane śukar makhle. E piktura śukar la khangerǎqi dikhǒl anda dudǎripen, o monumento sǎ ingǎrindoj le pakivales and-ol nakhle berśa barikane amare phurenqe, kothe kaj o timpo sas les jekh aver molipen. Sa o andruno ansamblo si e opera jekhe śerutne piktoresqi andar o Läpuś kaj bućhol Radu Muntǎnu, kaj avel andar o gav Ungureni. Les na sas les studii uće, ama ʒanglǎs sar te sikavel pand-ol ranga, bi te paruvel, o ćaćipen pala e istoria le kreśtinismosqi.

Korkorutne eksperience

O skulptori Śerban Nikolae (ateliero skulpturaqo and-o kaśt, le śajunimaça te keres buki);
O Muzeo Florean (skulptura and-o bar, kaj si p-o Pietriś, kam 10 km de dur);
E Mänästirǎ Rohia (o astaripen la ortodoksiaqo kathar, kam 12 km de dur);
Ol xainga paněsqe mineralo (borkut) andar o Rogoz haj e Pojana Botizaqi, kam 20 km de dur.
E oferta kulturalo lenqi: tabära arhitekturaqi, ekspozicia fotografiaqi, aćara k-e Patragi haj k-o Kräćuno.