E Khangeri kaśtukani „Ol Sfincă Apostolă Petru haj Pavel”, katar e Leurda

Te phiresa p-ol thana bistriceano, si tut o śajutnipen te arakhes jakh andar ol maj phirtune khangerǎ andar amaro them. And-e vremǎ, e khangeri kaśtukani „Ol Sfincǎ Apostolǎ Petru haj Pavel” phirdǎs maśkar ol lokaliteturǎ kluźeano Käśeju, Kiuieśti haj Leurda haj aćhilǎs and-e bar le Kompleksosqi Muzealo Bistrica-Näsäud.

Dikhesa la sigo, vaś ke dikhǒl pand-o dekoro skulptime motivojença le artaqe popularo romïnisko. Tikni haj paki, inkerel ol urme le pikturaqe kerdi prinʒarde piktorenθar katar e Nikula and-o śeliberś XVIII.

O giripen and-e khangeri kerel pes andar o pronaoso, o duvar o sudiko ućharel o udar. O ankadramento baro le udaresqp sas xurǎvdo motivojença ʒeometriko ćhinde: rozete xramosarde ande jekh poligono, o śelo khuvdo, zig-zag-oja haj ćhinimata and-e forma dandenqi ruvesqe.  

Phenes ke arakhlǎs pes katar ol nasulimata le vremǎqe haj daśtisajli, kadja ke śaj te lel tut ande laqo ilo vi ages! 

Tikno, o monumento ekleziastiko si vazdino pe jekh fundacia andar barr lenǎqo, haj si les ol duvara andar kile thule steźarosqe, save khuven pen k-ol kolcoja and-e „porri ćiriklǎqi”. E skulptura andral o sfïnto than si la motivoja dekorativo tradicionalo, sar si o śelo khuvdo vaj o motivo le khamesqo. 

O nakhipen katar o pronaoso karing o naoso boltaça semićilindriko kerel pes pande jekh giripen śukar xurǎvdo. Karing o altaro, ingeren trin girimata, kaj sas maj anglal ol udara thagarikane. Kadala śaj te aven dikhle ages k-o Muzeo Istoriaqo le Transilvaniaqo andar o Kluź-Napoka.

Ćak opral o pronaoso si o turno la khangerǎqo, savo inklel avri pande galeria parapetoça haj pand-ol turnulejoca skopoça dekorativo, kaj si and-ol śtar kolcoja le bazaqe le turnosqe.  

E piktura la khangerǎqi si d-andar o śeliberś XVIII, atunći kana sas kerdi but miśto katar ol zugravǎ katar e Nikula. Bezexalenθe, e vremǎ thodǎs pesqi amprenta pe laθe, haj ages maj inkerdǎs pes numaj ande cïra thana. 

Vi kadja, daśtisajlo pes o dikhipen varesave sćenenqo, maśkar save vi e sćena le Bezexeça oriʒionaro, o Thodipen p-o Truśul, E Palutni Kriss, e Sfïnto Treimea, e Dej le Devlesqi, haj vi ol 12 Apostolǎ trujarindoj le Isusos. 

O munićipio Bistrica si jekh than turistiko but śukar monumentojença  istoriko, ama vi pande oferta evenimentojenqi kulturalo. 

O Komplekso Muzealo Bistrica-Näsäud, kaj sas and-e sas kazarma habsbuʒiko vazdini k-o agor le śeliberśesqo XIX, aźukerel tut sikavimatença savremǎqe istoriqe, arheoloʒiaqe, etnografiaqe, ol ʒanglimata la naturaqe. Avrǎl e Khangeri kaśtukani katar e Leurda, and-e bar andral maj śaj te dikhes ol khera tradicionalo andar o Śanc haj Arkiud.  

Andar ol obiektivoja turistiko save trebul te dikhel len kana aćhes and-e Bistrica, phenas numaj varesode: e Khangeri Evangeliko C.A., o Ansamblo „O Śiro Sugälete”, ol Duvara la Dizaqe Medievalo haj o Turno le Dogarenqo, e Khangeri haj e Mänästirea minorito, e Mänästirea haj e pjaca Dominikano, e Khangeri romano-katoliko „E Sfïnto Treimea”, e Sinagoga, o Kher le Ruputnaresqo.