E khangeri reformime andar o Hodod

Kana daśtisarenas te dikhen e Atlantida anglal te na maj avel, ći dikhlenas? Vareso sa kadja de pharo haj kaj na daśtil te avel laćhardo si k-o Hodod, la Khangerǎça Reformime: peravdǒla. 

But purani, e parohia romano-katoliko kathar si lipardi and-ol lila inke andar ol berśa 1333 haj 1335. E khangeri sas vazdini vaś-o Somnal thagar Ladislau, and-o stilo gotiko.

Inke katar o giripen, jekh fisura xorrutni ʒal andar o duvar d-opral o udar. Andral, o śudripen haj o aćhipen garaven barvalimata but. Śaj ke e maj śerutni buki si o amvono, la śopnǎça baluśtrença barresqe, kaj anel amenqe gogi pa ol kristelnice medievalo. Ol panooja si xurǎvde rozetença haj vreźojença palembiandimasqe palune, śukarǎrde, haj vi le blazoanença la familiaqe Wesselényi. 

Aśunas ke o gav nakhlǎs k-o pakǎjipen reformime bute berśenθar, laqo jekhto predikatori sas prinʒardo andar o berś 1557. Siklilosas k-o Wittenberg. Ol phanglimata kadale domeniosqe le bare aristrokraciaça haj e kultura medievalo la Europaqi vazdine les te na avel feri jekh bastiono brakhimasqo, ama vi jekh ćentro le neve ćivilizaciaqo. Dikh ol kasteloja Wesselényi haj Dégenfeld andar o gav haj dikhesa kire jakhença. 

Bezexenθar, e paramisi le reformime khangerǎqi aresel k-o agor. Ol spećialiśtǎ phenen ke bukǎ phare, sar ke e phuv ćhalavel pes tal-e khangeri vi pala o zorǎripen haj ći daśtil te kerel pes vareso laćho kaj te aćhavel o rimosaripen. Kadja, phenen kadala, na-i baxt te maj xastran haj te labǎren e khangeri and-ol berśa kaj aven. Kodolesqe, arakhav tut te dikhes la akana.

Ande kadala thana, ol arheoloʒǎ haj ol istorićǎ sa kalaven śukar aćhilimata. Jekh andar ol maj śukar andar kadala arakhimata sas and-o berś 1995, kana sas arakhli jekh kripta tal-e khangeri. 

And-e kripta sas jekh sikrio opre savesθe sas xramome o anav Túri Sára, haj paśe o berś 1733. Ol mulane gada arakhle sas jekh fusta postavosθar, jekh keźlani bluza haj jekh zeleno korseto. Kadala sas palemkerde haj daśtin te aven dikhle k-o Muzeo Źudecǎno andar o Satu Mare, haj si ankalavde te aven dikhle.

E lokalitatǎ Hodod si la jekh barvali istoria, pakǎl pes ke si o ćentro le thanesqo ʒi and-o śelberś XX. Kadja ke, pala so dikhlen e khangeri reformime, akharas tumen te dikhen jekh rig kadale istoriaqi haj te dikhen o Kastelo Wesselényi, vazdino and-o śelberś V-lea. O vazdipen sas rimome and-o Maripen Independenciaqo le Rákocziosqo, haj pe lesqe aćhilimata sas kerdo, and-o berś 1761, jekh nevo kastelo and-o stilo baroko. 

Sa kadja, jekh aver kastelo śerutno kaj si pe kadala phuvǎ si vi o Kastelo Dégenfeld, vazdino maśkar ol berśa 1790-1810.