E Kaśtukani Khangeri ”O Biandipen la Rajesqo’’ (‘’Nașterea Domnului”) Kälugärica

E kaśtukani khangeri „O Biandipen le Rajesqe Dajaqo’’ (‘’Nașterea Maicii Domnului”) Kälugärica si importanto vaś e rumunikani tradicionalo arhitektura. Sas vazdini and-o berś 1746 kaθar o raśaj o Konstantin haj pesqe phrala, andar ol love dine le manuśenθar.

E piktura le khangerǎqi si kodoja e oriʒinalo, kerdi and-o berś 1836 and-e tehnika freska. Dikhesa ćaćes ol elementurǎ le thanesqe andar e veʒetalo lumǎ haj si o sano kenari lulugěnqo. 

O pridvori dikhǒl maśkar o dekoro le Stïlpenqo kerde and-o kaśt steźarosqo. 

E khangeri si but musardi, ama sa mukhel tut bimujesqo pesqe purane ikonença piktime p-o kaśt haj jekh si semnome „Diakul Radu zugravu 1791". Jekh piesa kaj na akhel pes prǎ but si o polikandro astardo boltaθar maśkar jekh vast and-e savesθe si jekh kaśtukano truśul deśuduje dudença.

Mukh tut ingerdo kaθar so tu kames te dikhes haj lośaresa tut kana dikhesa so aver kuć bukǎ si inkerde kathe! 

---

Xarno istoriko rodinipen

Pala e katagrafia andar o berś 1840 le sas źudecosqi  Musćel, e parohia Glïmbokata phiravelas maj anglal o anav Kälugärica, avindoj rig andar o than le Svuntone Khangerǎqo Kïmpulung. O vazdipen sas kerdo p-jekh zidosqi temelia, kaθar o raśaj o Konstantin haj pesqe phrala  Stoika Mierlea haj Enake Dobra, and-o berś 1746. 

Phenel pes ke o anav Kälugärica avel kaθar jekh purano skito kälugäricenqo. Kadaja sas and-e limori de akanara haj trujal e Khangeri monumento istoriko. Ol manuśa le thanesqe anen penqe gogi ke, atunći kana thode reza haj rukha kana sas e kolektivizarǎ, arakhe karamide vatraqe, vatre sobenqe haj vi urme kherenqe. Kadala bukǎ arakhle śaj ke sas andar ol purane kherorre le kälugäricenqo, ućharde palal. 

---

O jekhipen le pikturenqo:

E piktura le khangerǎqi si kodoja e oriʒinalo, kerdi le vazdinimaça kaθar o baro raj kothar, o Stanćiu Viespesku, ama pakǎl pes ke andral maj sas vi jekh aver piktura. 

Jekh artistiko barvalipen si le thagarikane ikonen, piktime p-o kaśt haj thode p-e katapetǎsma andar o zido le naososqo. And-e ćaći rig si e ikona le hramosqi, sikavindoj O Biandipen le Rajesqe Dajaqo, haj and-e zervi rig le katapetǎsmaqi si e ikona le Svuntosqi Jerarho Nikolae, savo si o dujto hramo le khangerǎqo. 

E katapetǎsma sas piktime and-o berś 1834. Akana, thuvardi kaθar ol momelǎ, na maj dikhǒl savorri piktura kadalaqi, ama śaj te dikhen pen ol trin reʒistrurǎ le kultosqe ortodokso: ol 12 thagarikane xamata, ol 12 Apostolǎ haj Ol Sfincǎ Prooroćǎ le Purane Testamentosqe. 

---

Jekhutne bukǎ kaj ʒives len 

Kana san and-o Leordeni, ʒa haj dikh vi o Kher Memorialo „Dinu Lipatti”, jekh baro kher vazdino and-o stilo neorumunicko kaθar o dad le Dinu Lipattiosqo, o violonisto Konstantin Lipatti, maśkar ol berśa 1938-1942. Kathe arakhesa jekh but bari kolekcia forografienqi haj lilorre, save sikaven o ʒivipen haj so kerdǎs o baro pianisto haj kompozitori gaʒo, haj vi but bukǎ kaj sas lesqe, sar si o piano Bechstein, diplome vaj partiture.

Jekh than kaj aśtil te lośarel kirro gi si e Khangeri Sf. Kalinik andar o Kälineśti.